PASKE

Post Reply
Guest

PASKE

Post by Guest » Wed Nov 01, 2006 11:35 pm

Ti Gus ekri:
PASKE

Paske ou wè m pap krye, ou panse m pap soufri
Paske ou wè m pap plenyen, ou panse m pa konprann
Paske ou wè m pap rele, ou panse m se mouton
Paske ou wè m ap danse, ou panse ke m kontan

Paske ou wè m abiye, ou konprann afè m bon
Paske ou wè m ak krizokal, ou konprann se lò
Paske ou wè yon bout kay, ou konprann se palè
Paske ou wè m milat, ou konprann m se boujwa

Paske ou wè m nèg, ou joure m “Nigger!”
Paske ou wè m an kolè, ou rele m “Chimè!”
Paske ou wè m pòv, ou rele m “Moun sa yo”
Paske ou kandida, ou rele m “Frè m…Sè m...”

Paske ou wè m ap chante, ou panse m pa grangou
Paske ou wè m pa mande, ou panse m pa bezwen
Paske ou wè m pa joure, ou panse m pa fache
Paske ou wè m inosan, ou konprann pou w pile m

En ben… mwen se Bous Tabak ki konn bat Malfini
Mwen se Manchini! Al mande Makandal
Mwen se pwazon Goumba! Mande “Roz-an-Fè”
Si ou konprann mwen manti, kontinye anmède m!!!



Ti Gus

Post Reply